Igor Gauna (Bolu Barri)

Igor Gauna osintxuarrak metalurgian lan egin du bizitza osoan. Bere bizitzari buelta bat eman eta lehen sektorera salto egitea erabaki du. Bere helburua da Bolu Barri baserriari erreleboa ematea; izan ere, oinordekotzarik gabe geratzear dagoen baserria da Bolu Barri.

Igorrek kasualitatez ezagutu zuen Trebatu programa, nekazaritza sektorean lan egiten duten gertuko pertsonei esker “nekazaritzan lan egiten duten ezagun batzuei esker ezagutu nuen Trebatu programa. Konturatu nintzen neuk eman nahi nuen bizitza-aldaketarekin oso lerrokatuta zegoen programa zela, eta horregatik izen-ematea erabaki nuen. Bolu Barri baserriak bederatzi langile ditu eta arrakasta handiko negozioa da. Beharrezkoa ikusten nuen proiektu honi jarraipena ematea eta Trebaturi esker hori posible egiteko aukera dut”.

Igorrek dio Trebatu programan topatu duen abantailarik handiena proiektuaren ikuspegi integrala dela “Trebatuk, Trebalariak eta Trebatze guneak batzeaz gain, funtsezkoak diren arloetan prestakuntza eskaintzen du, hala nola, finantza edo administrazio kudeaketan. Gure negozioa garatzeko beharrezko laguntza da hau”. Bere proiektuak zein norabide hartuko duen ez dakien arren, Igorrentzat esperientzia aberasgarria izaten ari da “egunero ikasten dut zerbait berria, eta proiektu hau nola amaituko den ez dakidan arren, ziur nago erabaki zuzena hartu dudala eta, oso pozik nago prozesuarekin. Zalantzarik gabe, lehen sektorean ekiteko asmoa duten pertsona guztiak animatzen ditut Trebatu programara”.